Proverbs 30

Izitsho Zika-Aguri

1Amazwi ka-Aguri indodana kaJakhe, amazwi ahlakaniphileyo:

Umuntu lo wathi ku-Ithiyeli:

“Ngikhathele, Oh Nkulunkulu,
kodwa ngizophumelela.

2Angilalwazi okudlula bonke abantu;
angilakho ukuzwisisa komuntu.
3Angikufundanga ukuhlakanipha
njalo kangilalwazi ngaye oNgcwele.
4Ngubani oseke waya ezulwini waphinda wehla na?
Ngubani oseke wafumbatha umoya ngesandla sakhe na?
Ngubani oseke wagoqela amanzi ngesigqoko sakhe na?
Ngubani omise yonke imikhawulo yomhlaba na?
Lingubani ibizo lakhe, lebizo lendodana yakhe?
Ngitshela nxa usazi!


5Wonke amazwi kaNkulunkulu akalamposiso;
uyisihlangu kulabo abacatsha kuye.
6Ungengezeleli emazwini akhe,
funa akukhuze akwenze umqambimanga.

7Zimbili izinto engizicela kuwe, Oh Thixo;
ungangincitshi zona ngingakafi:
8Susa kimi inkohliso lamanga;
ungangiphi ubuyanga loba inotho,
kodwa ungiphe kuphela ukudla kwami kwansukuzonke.
9Phela ngingaba lokunengi kakhulu ngikuphike wena
ngithi, ‘Ungubani uThixo?’
loba ngibengumyanga ngintshontshe;
ngalokho ngiliyangise ibizo likaNkulunkulu wami.

10Ungahlebi inceku enkosini yayo,
ngoba izakuqalekisa ungene enkathazweni.

11Bakhona abathuka oyise,
abangababusisiyo onina;
12labo abazibona belungile
ikanti kabahlambululwanga emanyaleni abo;
13labo abamehlo abo ahlezi egcwele ulaka,
abakhangela ngokudelela;
14labo omazinyo abo zinkemba,
omihlathi yabo inanyathiselwe izingqamu
ukuze baginye abayanga baphele emhlabeni,
labaswelayo abaphakathi kwabantu.

15Umkhaza ulamadodakazi amabili;
ayamemeza athi, ‘Siphe! Siphe!’

Zintathu izinto ezingasuthiyo,
zine ezingakaze zithi, ‘Sekwanele!’:
16lingcwaba
yisisu senyumba,
lomhlabathi ongasuthiyo amanzi,
lomlilo ongezukufa wathi, ‘Sekwanele!’

17Ilihlo elihleka uyise,
elidelela ukulalela unina,
lizakotsholwa ngamawabayi asesigodini,
lizadliwa ngamanqe.

18Kukhona izinto ezintathu ezingimangalisayo kakhulu,
ezine engingazizwisisiyo:
19indlela yengqungqulu emkhathini,
umzila wenyoka edwaleni,
indlela yomkhumbi olwandle,
lendlela yejaha lentombi.

20Le yindlela yesiphingikazi:
siyadla sesule umlomo waso
besesisithi, ‘Angenzanga lutho olubi.’

21Zintathu izinto ezizamazamisa umhlaba,
zine ongeke uzithwale:
22yinceku ebayinkosi,
yisiwula esisuthiyo,
23ngumfazi owendileyo ongathandwayo,
lencekukazi ethathela inkosikazi indoda.

24Kukhona emhlabeni izinto ezine ezincinyane,
ikanti-ke zihlakaniphile kakhulu:
25Ubunyonyo kabulamandla anganani,
kodwa buyabuthelela ukudla kwabo ehlobo;
26lezimbila ziyizidalwa ezilamandla angatsho lutho,
kodwa zenza izikhundla zazo ezingoxweni zamadwala;
27izintethe kazilankosi,
kodwa zihamba ziludibi olwesabekayo;
28umbankwa ungabanjwa ngesandla,
kodwa ungena lasezigodlweni zamakhosi.

29Kulezinto ezintathu ezihamba zinqekuza kamnandi,
zine ezihamba zibeka kamnandi:
30yisilwane, esilamandla esabekayo phakathi kwezilo, esingabalekeli lutho;
31liqhude eliditshazelayo,
yimpongo,
njalo lenkosi nxa ihanqwe libutho layo.

32Nxa ube yisithutha waziphakamisa,
kumbe nxa wakhe amacebo okwenza okubi,
vala umlomo wakho ngesandla sakho.
33Ngoba njengokuphehla uchago kudala iphehla,
lanjengoba ukugubha amakhala kubanga umungula,
kunjalo ukuvusa ulaka kudala ingxabano.”